ເຈົ້າໜ້າທີ່ ນະຄອນຫຼວງ ກຽມລົງມ້າງ ແຫລ່ງຄ້າປະເວນີ ຫລາຍຈຸດ

ພັທ ສຸລິວັນ ລາດຊະວົງ ຫົວໜ້າຫ້ອງຕໍາຫຼວດ ຫົວໜ້າກອງເລຂາ ນະຄອນຫຼວງວຽງຈັນ ໄດ້ລາຍງານໃນກອງປະຊຸມການຕິດຕາມກວດກາ ແລະ ການຈັດຕັ້ງການເຄື່ອນໄຫວວຽກງານຄ້າມະນຸດ ທີ່ຈັດຂຶ້ນໃນວັນທີ 4 ທັນວາທີ່ຜ່ານມາ ວ່າ:

ໄລຍະຜ່ານມາ, ການເກັບກໍາສະຖິຕິ ກ່ຽວກັບ ວຽກງານການຄ້າ-ຂາຍປະເວນີ ໃນນະຄອນຫຼວງວຽງຈັນ ຢູ່ບັນດາສະຖານທີ່ຕ່າງໆ ທີ່ເປັນຈຸດຫຼ່ໍແຫຼມ ເປັນຕົ້ນແມ່ນ ໂຮງແຮມ, ເຮືອນພັກ, ຮ້ານກິນດື່ມ-ບັນເທີງຕ່າງໆ ພົບວ່າ: ທົ່ວນະຄອນຫຼວງວຽງຈັນ

ສາມາດກວດພົບ ຮ້ານອາຫານ-ຮ້ານກິນດື່ມ ທີ່ມີການຄ້າ-ຂາຍປະເວນີ 82 ຮ້ານ, ໂຮງແຮມ 16 ແຫ່ງ,

ຮ້ານຄາລາໂອເກະ 3 ຮ້ານ, ເຮືອນພັກ 2 ຫຼັງ ແລະ ຮ້ານເສີມສວຍ-ກາເຟ ຈໍານວນ 2 ຮ້ານ. ນອກນີ້, ຍັງມີພື້ນທີ່ສັບສົນ ຈໍານວນ 9 ຈຸດ,

ໂດຍສະເພາະ ເສັ້ນທາງ 450 ປີ, ເຂດບ້ານໜອງບຶກ, ບ້ານໂຊກນ້ອຍ, ບ້ານໂພນປ່າເປົ້າ ແລະອື່ນໆ.

ເຊິ່ງໃນຈໍານວນດັ່ງກ່າວ ໄດ້ເຮັດບົດບັນທຶກ-ສຶກສາອົບຮົມກັບ ຜູ້ຄ້າປະເວນີ ຈໍານວນ 82 ຄົນ ເປັນຄົນຫວຽດນາມ 21 ຄົນ,

ຜູ້ຂາຍປະເວນີ 357 ຄົນ ເປັນຄົນຫວຽດນາມ 36 ຄົນ, ສຶກສາອົບຮົມ ຜູ້ທີ່ມີຄວາມສ່ຽງຕົກເປັນເຫຍື່ອການຄ້າມະນຸດ ຈໍານວນ 45 ຄົນ

ທ່ານ ພັທ ສຸລິວັນ ລາດຊະວົງ ຍັງໃຫ້ຮູ້ຕື່ມອີກວ່າ: ໄລຍະປີ 2012 ຫາ 2019, ໄດ້ດໍາເນີນຄະດີຄ້າມະນຸດທັງໝົດ 13 ເລື່ອງ; ໃນນັ້ນ, ສົ່ງໄອຍະການ ຈໍານວນ 9 ເລື່ອງ, ໂຈະການດໍາເນີນ 4 ເລື່ອງ,

ຜູ້ຖືກເຄາະຮ້າຍມີ 25 ຄົນ, ຕໍ່າກວ່າ 18 ປີ ຈໍານວນ 16 ຄົນ, ຜູ້ຖືກຫາມີ 13 ຄົນ ຍິງ 10 ຄົນ ແລະ ກໍາລັງດໍາເນີນຄະດີຄ້າ-ຂາຍປະເວນີ 6 ເລື່ອງ.

ເຊິ່ງຍັງໃຫ້ຮູ້ຕື່ມອີກວ່າ: ຄຽງຄູ່ກັບການປະຕິບັດມາດຕະການດ້ານລະບຽບກົດໝາຍແລ້ວ, ກໍຈະໄດ້ເພີ່ມທະວີວຽກງານໂຄສະນາຜົນຮ້າຍຂອງການຄ້າມະນຸດຕາມສະຖານທີ່ຕ່າງໆເປັນຕົ້ນແມ່ນ:

ດ່ານສາກົນ, ຈຸດຊຸມຊົນແອອັດ, ສະຖາບັນການສຶກສາ, ໂຮງຈັກໂຮງງານ, ເຂດທ່ອງທ່ຽວ ແລະ ສະຖານທີ່ອື່ນໆ. ເພື່ອເັຮດໃຫ້ບັນຫາບໍ່ດີດັ່ງກ່າວໝົດໄປເທື່ອລະກ້າວ.

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *